ہم لوگ تو قابل ہی نہیں آئیں مدد کو رب تیری حفاظت کرے ، آمین ، فلسطین کومل جوئیہ ۔۔۔۔۔۔۔۔۔

 ہونگے یہ نصابوں میں مضامین ، فلسطین

تاریخ ترے خون سے رنگین ، فلسطین

پکڑیں گی قیامت کو گریبان ہمارا

لاشوں کی عزادار خواتین ، فلسطین

بچوں کی صداؤں سے بھی کانپے نہیں سینے

گم عیش میں امت کے سلاطین ، فلسطین

خود طوق میں لپٹے ہیں غلامی کے مسلسل

کر سکتے ہیں بس صبر کی تلقین ، فلسطین

دشمن وہ تمہارا ہے ہمارا تو نہیں ہے

جھپٹیں گے کہیں اور یہ شاہین ، فلسطین

لفظوں کی حدوں تک ہیں یہاں امن کی باتیں

ٹھوکر پہ ہیں ورنہ یہ قوانین ، فلسطین 

ہم لوگ تو قابل ہی نہیں آئیں مدد کو

رب تیری حفاظت کرے ، آمین ، فلسطین

کومل جوئیہ ۔۔۔۔۔۔۔۔۔۔۔۔۔