بھکر ( ظفر اعوان ) بھکر کے معروف سیاسی ، سماجی و کاروباری شخصیت آرگنائزر جنوبی پنجاب پاکستان مسلم لیگ ن ینگ ورکرز پاکستان ، نائب صدر جنوبی پنجاب پاکستان کیمسٹ اینڈ ڈرگسٹ ایسوسی ایشن پاکستان و ضلعی صدر کیمسٹ ایسوسی ایشن ضلع بھکر فہیم احمد خان کے بہنوئی مشہور و معروف سینئر صحافی اظہار احمد خان کی اچانک وفات پر زندگی کے ہر شعبہ جات سے تعلق رکھنے والے احباب و اہم سیاسی ، سماجی و کاروباری شخصیات نے فہیم احمد خان سے ملاقات کرکے اظہار تعزیت کیا اور مرحوم کیلئے مغفرت اور پسماندگان کیلئے صبر جمیل کی دعا کی۔
یاد رہے سینئر اور تجربہ کار صحافی اظہار احمد خان دو ماہ پہلے بھکر سے اپنے آبائی ضلع ملتان شفٹ ہوئے تھے جہاں وہ اپنی بیٹی کی تعلیم اور بیوی کے علاج کے لئے ٹھہرے ہوئے تھے، اظہار احمد خان ایک خالص پیشہ ور صحافی تھے جنہوں نے اُردو جرنلزم سے اپنے کیریئر کا آغاز کیا اور پھر اس سلسلے میں انہوں نے ملک کے بیشتر اخبارات و مقامی اخبارات میں خدمات انجام دیں اور خطاط کے طور پر بھی مختلف پرائیویٹ سکولز میں خدمات سرانجام دیں ، ان کی تحریر پختہ، رائے بہت صائب ہوتی تھی، مرحوم نے صحافیوں کی فلاح و بہبود کے لئے بھی خدمات سرانجام دیں اور فعال کردار ادا کیا، وہ مقامی اخبارات میں مختلف عہدوں پر بھی کام کرتے رہے ۔ انہوں نے مستقل تقریبا 25 سال بھکر میں قیام کیا۔ جہاں صحافتی برادری میں مقبول تھے شوگر کے عارضہ میں مبتلا تھے اور اچانک معدہ کے السر کی وجہ سے خون کی الٹی کے سبب قضائے الہی سے جمعہ اور ہفتہ کی درمیانی شب وفات پائی، ان کی وفات پر ضلع بھکر کے ہر طبقہ فکر سے تعلق رکھنے والے افراد نے فہیم احمد خان سے ملاقات کرکے گہرے رنج اور افسوس کا اظہار کیا ، اللہ تعالیٰ مرحوم کی مغفرت فرمائے اور پسماندگان کو صبر جمیل عطا فرمائے۔ آمین یا رب العالمین
کوئی تبصرے نہیں:
ایک تبصرہ شائع کریں